God sommar!

Sommarturen er over. Alle som var med, bidrog til at dette vart ein minneverdig tur med masse høgdepunkt. For mange vart vel konserten i Nürnberg eit utadretta høgdepunkt med fleire ekstranummer og kjempegod respons frå dei mange frammøtte i den store St Ludwig kirche. Særskilt takk til Nadja som har ordna alt det praktiske i samband med denne konserten! Det var også fint å møte Maria M igjen der. Men også dei andre konsertane - både dei planlagde og dei spontane - var fine utadretta opplevingar. Men årets sommartur inneheldt så mange andre høgdepunkt, det er nok å vise til bilder og helsingar som etter kvart blir lagt ut på ungdomskoret.com. Eit høgdepunkt var det å få ta imot følgjande uttale frå Color Line ombord på Color Fantasy: "Dere ledere har grunn til å være stolte over ungdommene som dere har med på tur. De er helt eksemplariske! Helt fantastisk med så mange som 120 personer på tur med oss og ingen ting negativt er meldt!" Takk til alle for det! Takk til vaksenteamet med Ragnhild, Åse, Marianne, Asbjørn, Jarle, Peter Inge, Roald og Oddrun og ungdomsteamet med Håkon, Simon og Mathias for ein kjempeflott jobb før og under turen! Med eit så bra fellesskap er det triveleg å vere ansvarleg leiar! Takk også til våre dyktige sjåførar Kai-Even, Idar og Arvid! Takk til SI-Reiser v/Corina Klokk for proff og god hjelp med turopplegget!

Takk til det faste v-teamet for stor innsats gjennom heile sesongen! Særskilt takk til Julie, som no kallar seg "gamledirigent" allereie, for tre år som dirigent! Du har vakse med oppgåvene. Fleire av storslagerane på repertoaret er det du som har komt med og øvd inn med stor entusiasme. Til hausten er det Ingrid Steffensen og Mari Gisnås som skal dirigere koret. Simon Molvær Grimstad får ansvaret for talentutvikling med vekt på solistar. Dette skal bli bra! I august reiser Ingrid og Mari til Viken Folkehøgskole på dirigentkurs i regi av Acta Normisjon. Takk til Eskild og Jon Georg for flott jobb med websidene våre! Når Jon Georg no reiser til Kongshaug, må vi ha ny webjournalist inn i staden. Sjå for øvrig forsida opp til høgre. Takk til Oddrun, Kai-Even og Anita for dei mange gode andaktane på øvingane gjennom heile året! Takk også til Liva for at du stiller opp annankvar mandag med tilbod om forbøn og samtale! Du er beviset på at det går fint an å ha ei aktiv rolle i Respons etter å ha fyllt 70. Takk til sponsorar og andre støttespelarar! Det kjem vel med!

"Ein gong responsar - alltid responsar!" er blitt eit velbrukt slagord - særleg ved sesongavslutning. Eg trur og håpar at dei fleste som sluttar i Respons på grunn av alder og/eller flytting, ser tilbake på tida i Respons med glede og ikkje er redd for å ta med desse åra på CVen sin. Vi som har ansvaret for Respons ønskjer iallfall at tida i Respons skal gi noko verdifullt å ta med vidare i livet - anten det er av musikalsk, sosial eller åndeleg verdi. Aller helst alle delane i tråd med "Heilt liv"-profilen vår! God sommar! Blessings!